Се урна покривот на ноќен клуб во Доминиканската Република, загинаа најмалку 98 лица

Покривот на познат ноќен клуб во главниот град на Доминиканската Република, Санто Доминго – „Jet Set“ се урна утрово за време на концерт, на кој присуствувале политичари, спортисти и други гости, соопштија властите. Во несреќата загинаа најмалку 98 лица, а 160 се повредени, пренесува Асошиејтед Прес.

Екипите за спасување продолжуваат да трагаат по преживеани под урнатините од еднокатниот клуб, изјави Хуан Мануел Мендез, директор на Центарот за итни операции на Доминиканската Република. „И понатаму расчистуваме урнатини и бараме луѓе. Ќе бараме неуморно.“ изјави Мендез.

Повеќе од 12 часа по уривањето на покривот врз гостите, спасувачките екипи сè уште вадат преживеани од под урнатините, молејќи за тишина за да слушнат евентуални крици за помош. Пожарникарите вадеа скршени бетонски блокови и користеа исечени парчиња дрво како платформи за подигање на тежок шут, додека воздухот одекнуваше од звукот на дупчење бетон.

Меѓу жртвите е и Нелси Круз, гувернерка на северозападната провинција Монте Кристи и сестра на седумкратниот бејзбол играч Нелсон Круз. Таа го повикала претседателот Луис Абинадер во 00:49, велејќи дека е заробена и дека покривот се урнал, соопшти првата дама Ракел Абраје. Официјалните лица изјавија дека Круз починала подоцна во болница.

Семејството на пејачот Руби Перез, кој настапувал во моментот на уривањето, прво соопшти дека тој бил спасен, но подоцна Мендез изјави дека тоа не е точно и дека спасувачите сè уште трагаат по него.

Обвинителката Розалба Рамос за телевизијата CDN изјави дека иако „сите сакаат да знаат што точно се случило“, засега фокусот останува на пронаоѓање преживеани. Во близина на клубот бил поставен привремен мртовечница, додека повеќе од 120 лица чекале ред да донираат крв на две различни локации.