Администрацијата на Трамп се закани дека ќе му забрани на Харвард да запишува странски студенти

Американската влада се закани дека ќе му забрани на Универзитетот Харвард да запишува странски студенти, откако институцијата соопшти дека нема да потклекне пред барањата на администрацијата на Доналд Трамп, пишува Би-би-си. 

Белата куќа побара од најстариот универзитет во САД да направи промени во наставниот кадар, вработувањето, приемот и наставните практики за кои вели дека ќе помогнат во борбата против антисемитизмот на кампусот.

Министерката за внатрешна безбедност, Кристи Ноем, во средата го обвини универзитетот за „загрозување на националната безбедност“ и „виткање на колено пред антисемитизмот“.

Таа, исто така, побара евиденција за „незаконски и насилни“ активности на студенти со странски студентски визи. Меѓународните студенти сочинуваат повеќе од 27 проценти од запишаните на Харвард оваа година.

„Универзитетот нема да ја предаде својата независност или да се откаже од своите уставни права“, напиша претседателот на Харвард Алан Гарбер во понеделникот во порака до заедницата на Харвард.

Трамп на неговата социјална мрежа напиша дека Харвард повеќе не е пристојно место за учење.

„Харвард повеќе не може да се смета за пристојно место за учење и не треба да се става на ниту една листа за големи светски универзитети или колеџи. Харвард е шега, учи на омраза и глупост и повеќе не треба да добива федерални фондови“, рече Трамп во средата на својата платформа „Truth Social“. 

За време на неговата претседателска кампања, Трамп воведе репресии за финансирање на универзитетите, прикажувајќи ги како непријателски настроени кон конзервативците.