Распишан конкурс за краток стрип на фестивалот „Стрип трип“, со рок до 25 мај

Здружението „Макстрипови“ има распишано конкурс за краток оригинален стрип, што ќе биде претставен на фестивалот „Стрип трип“ кој ќе се одржи на почетокот на јуни во Скопје. Конкурсот е отворен за учесници од сите возрасти, а рокот за испраќање на делата е до 25 мај 2025.

Фестивалот „Стрип трип“ за прв пат беше одржан во манатата година. Негов дел беше и конкурс за најдобра стрип-корица на кој учествуваа над 60 дела.

Годинешното издание на фестивалот ќе се одржи од 6. до 8. јуни во МКЦ Скопје.

Темата и формат на стриповите со кои може да се учествува на конкурсот не се однапред ограничени, а препорачаниот обем на страници е 1-16, иако организаторите посочуваат дека се добредојдени и подолги дела. Сугерираните димензии се А3 формат на 300 dpi.

Главен предуслов е стриповите да не бидат објавувани претходно.

Во дигитална форма, делата може да се пратат по е-пошта на адресата makstripovi.ngo@gmail.com, а на хартија до здружението „Макстрипови“ на ул. ул. „13 јули“, бр. 1/5, 1000 Скопје.

Од истото здружение најавија дека освен учество во изложбата на фестивалот, за авторите на најдобрите стрипови ќе следуваат парични и непарични награди.

Заинтересираните може да добијат повеќе информации преку социјалните мрежи Инстаграм, Фејсбук или преку е-поштата.

На 6. мај, здружението организира и настан „Загревање за Стрип трип“ во Нетавил во Скопје, на кој ќе учествуваат и стрипаџиите Симон Калајџиев и Белкин Аксу.