Владата ги демантира наводите на СДСМ: Ресторанските трошоци не се за министрите, туку за вработените во министерствата

„Трошоците што ги прикажуваат како наводни трошоци за министри се всушност трошоци за услугите што ги користат вработените во министерствата. За овие услуги, вработените сами ги плаќаат, а истите не се на товар на буџетот“, изјавија од Владата, објаснувајќи дека бифињата во министерствата се целосно одделени од личните трошоци на министрите.

Дополнително, Владата потсети дека токму во време на владеењето на СДСМ, оператор на ваквите ресторански услуги беше компанијата „Концепт“, која доаѓа од Струмица и беше дел од контроверзиите во тоа време.

„Времињата кога министрите од СДСМ трошеа огромни суми за скапи луксузи, како што беше патувањето со владиниот авион до Ниш или Солун за шопинг, завршија. Сега, владата води политика на транспарентност и рационално трошење на јавните средства“, велат од Владата.

Во реакцијата, се додава дека се прави разлика помеѓу неконструктивните обвинувања од страна на опозицијата и одговорната работа на актуелната влада. Претставниците на Владата апелираат на внимателност при прифаќањето на информации кои, според нив, се дезинформирање и манипулации од страна на СДСМ.

„СДСМ одбра да продолжи со својата неконструктивност и неспособност. Апелираме за голема претпазливост кога станува збор за информации кои доаѓаат од партија позната по дезинформирањето“, стои во официјалната изјава.

Владата се надева дека јавноста ќе ги третира ваквите обвинувања со скептицизам и ќе се фокусира на конструктивни дебати за иднината на државата, наместо на манипулации и политички напади.