Израелската војска соопшти дека 107 камиони со хуманитарна помош влегле во Газа

Хуманитарните работници кои се обидуваат да ја распределат ограничената помош што влегува во опколената Појас Газа ја опишуваат ситуацијата како логистички „кошмар“ среде влошувачка хуманитарна криза, пренесува Ројтерс.

„Со ова ограничено количество помош, хуманитарната состојба продолжува да се влошува“, изјави д-р Амџад Алшава, директор на Мрежата на палестински невладини организации, група што ги обединува палестинските организации, за NBC News во средата. „Во исто време, Израелците воведуваат ограничувања за пристап до овие залихи.“

Портпарол на Канцеларијата на Обединетите нации за координација на хуманитарните прашања изјави дека хуманитарните работници успеале да подигнат најмалку 90 камиони со помош во средата навечер — но не беше јасно дали таа помош е распределена до четвртокот наутро.

Во меѓувреме, екипата на NBC News на терен опиша широко распространето незадоволство меѓу Палестинците кои чекаат да видат дали ќе пристигне повеќе помош во енклавата. Многу хуманитарни организации ги прекинале или ги намалиле своите дистрибуции на храна поради недостаток на залихи и високите цени на ретките производи достапни на пазарите.

По речиси тримесечна блокада за влез на храна, лекови и друга помош во Газа, Израел во последните денови дозволи ограничено количество залихи да влезе во енклавата под зголемен меѓународен притисок. Хуманитарните организации велат дека Израел вовел и нови правила за влез на залихите, кои според нив се причина за логистичките проблеми и доцнењето на доставата на храна и лекови до оние на кои им се најпотребни.

COGAT, одделот на израелската војска задолжен за координација со Палестинците, соопшти во четвртокот дека 198 камиони влегле во Газа, но не коментираше конкретно за новите процедури и ја упати NBC News до канцеларијата на израелскиот премиер Бенјамин Нетанјаху, која не даде непосреден одговор.

Според податоците на COGAT, најголемиот дел од помошта била храна, додека лекови и медицинска опрема сочинувале помал дел.

Хуманитарните организации предупредуваат дека ограничената помош што пристигнува е само мал дел од она што е навистина потребно — пред војната, во Газа во просек влегувале околу 500 камиони дневно, според Британскиот Црвен крст.

И покрај повторното дозволување влез на помош, до доцна во средата речиси и да немало помош што стигнала до палестинските цивили, велат хуманитарните организации, обвинувајќи ги новите израелски процедури дека ја комплицираат веќе заплетканата операција.

Логистички ‘кошмар’

На брифинг во средата, портпаролот на генералниот секретар на ОН, Антонио Гутереш, Стефан Дужарик, рече дека во еден случај, „израелските власти дозволија нашите тимови да влезат само низ една зона која беше премногу загушена, која ја сметавме за небезбедна и каде што беше многу веројатно да дојде до грабежи, имајќи го предвид долгото лишување од основни потреби во Газа.“

Иако израелските власти не ги објавија јавно деталите за новите правила, Дужарик во вторникот изјави дека хуманитарните работници биле приморани да ги истоварат залихите на палестинската страна од граничниот премин Керем Шалом, по што повторно морале да ги натоварат откако тимовите во Газа добиле дозвола да ги подигнат.

Тој додаде дека еден тим чекал „неколку часа“ за такво одобрување, но никогаш не добил дозвола да ја транспортира помошта.

Во меѓувреме, организацијата „Лекари без граници“ изјави дека многу од нејзините камиони биле „блокирани од причини кои понекогаш се непознати“, според шефот на мисијата за палестинските територии, Жан Ги Вато, кој зборуваше за NBC News во Ерусалим доцна во средата.

Иако тој додаде дека дел од новите процедури биле „воведени за да се спречи шверцот“, новиот систем „се претвори во логистички кошмар за организациите.“