Затегнати односи меѓу Братислава и Берлин: Фицо ја осуди заканата за намалување на ЕУ-фондовите

Словачкиот премиер Роберт Фицо денес остро реагираше на изјавата на германскиот канцелар Фридрих Мерц, кој најави можност ЕУ да ги намали фондовите за Словачка ако земјата продолжи да отстапува од заедничката линија на Унијата.

Ако некој сака да ја промовира политиката на едно обврзувачко мислење, тоа значи крај на демократијата во Европа. Никој овде не може да ни се заканува велејќи дека ако не послушаме, ќе ни стават ред.

изјави Фицо од Ерменија.

Тој додаде дека Словачка ги темели своите позиции на национални интереси, а не на „суета или тесноградост“. Според него, политиките на земјата не го прекршуваат владеењето на правото, како што се имплицира во некои критики.

Мерц: Не може малцинството да ја држи во заложништво целата ЕУ

Канцеларот Мерц претходно изјави дека, ако земјите како Унгарија и Словачка не ги сменат своите ставови, ЕУ неминовно ќе се соочи со конфликти. Тој оцени дека не е прифатливо мнозинските одлуки на Унијата да зависат од малцинството, алудирајќи на правото на вето кое овие земји често го користат за блокирање на санкции против Русија.

Фицо, пак, повторно ја критикуваше европската политика во однос на енергетиката, нагласувајќи дека прекинот на транзитот на гас преку Украина е грешка, исто како и евентуалната забрана на увозот на руско нуклеарно гориво.