Започнува електронското пријавување за средно образование – првиот рок трае од 14 до 17 јуни

Од утре, 14 јуни, започнува првото електронско пријавување на ученици за запишување во прва година во јавните средни училишта во Македонија за учебната 2025/2026 година. Аплицирањето ќе се врши онлајн до 17 јуни на полноќ.

Учениците ќе се пријавуваат преку платформата за електронски услуги на Министерството за образование и наука, достапна на https://e-uslugi.mon.gov.mk, со најавување преку сопствени кориснички сметки на schools.mk.

По завршување на електронската пријава, потребната документација ќе треба да се достави директно до училиштата на 18 јуни (од 8 до 19 часот) и 19 јуни (од 8 до 17 часот).

Конечните ранг-листи со примени ученици и преостанати слободни места ќе бидат објавени на 20 јуни, најдоцна до 12 часот, јавно во училиштата и/или на нивните веб-страници. Таму каде што ќе има потреба од квалификациско тестирање, тоа ќе се одржи на 23 јуни, кога ќе бидат објавени и резултатите.

Втор уписен рок во јуни

Второто електронско пријавување ќе се одржи на 30 јуни, а документацијата ќе се доставува на 1 јули, од 10 до 19 часот. Конечните ранг-листи ќе бидат објавени на 2 јули, а евентуално квалификациско тестирање ќе се организира на 4 јули.

Августовски рок – последна шанса за запишување

За оние кои нема да се запишат во јуни, августовскиот рок ќе се спроведе на 21 август, со електронско пријавување и доставување документи истиот ден. Резултатите ќе бидат објавени на 22 август.

Министерството за образование и наука веќе го објави Конкурсот со сите насоки, услови и потребни документи за запишување, достапен е на нивната официјална веб-страница.