Протест пред МВР поради одложеното рочиште за убиството на кучето Феникс

Денеска (15 јуни), во 12 часот, пред Министерството за внатрешни работи ќе се одржи протестен марш, организиран од граѓанската иницијатива „Зелен хуман град“, во соработка со активистички здруженија и групи за заштита на животните од целата држава. Повод за протестот е одложувањето на судското рочиште за убиството на кучето Феникс.

Од иницијативата порачуваат дека протестот ќе биде мирен, но гласен и масовен, како реакција на, како што велат, „неказнивоста на едно брутално убиство кое претставува тешка повреда на правниот и моралниот поредок во општеството“.

„Кога убиец останува на слобода, се губи довербата во институциите. Се праќа порака дека животот нема вредност, насилството се нормализира, а правдата станува избор, наместо обврска,“ велат организаторите.

Феникс, куче кое според активистите било симбол на добрина и кроткост, беше брутално убиено, а активистите бараат максимална затворска казна за осомничениот Љубе Крстевски и неговиот соучесник Бранко Билбиловски.

Барањата на здруженијата се следни:

• Итно расчистување на случајот и судска разрешница,

• Воведување минимум од една година затвор за кривично дело мачење и убиство на животни,

• Формирање општински служби за заштита на животните,

• Донесување закон за Комунална полиција со специјална единица за заштита на животни,

• Превентивни мерки за спречување насилство врз животни и

• Системска едукација за хумано постапување со животни.

Организаторите апелираат до сите граѓани кои веруваат во правда и хуманост да се приклучат на протестот и да испратат порака дека насилството нема да се толерира.