Родителите на жртвите од трагедијата во Кочани добиваат заканувачки пораки на социјалните мрежи

Дел од родителите на починатите деца во трагичниот настан што се случи неодамна во Кочани, пријавиле дека во последниот период добиваат пораки со заканувачка и недолична содржина преку социјалните мрежи. Некои од овие пораки биле и јавно објавени, предизвикувајќи згрозеност и осуда од јавноста.

Министерството за внатрешни работи е запознаено со случајот и преку соопштение информираше дека, иако до Секторот за компјутерски криминал сè уште не е поднесена официјална пријава, по добиени информации од јавноста и медиумите, се преземаат интензивни активности за расветлување на случајот.

По допрен глас, преземени се соодветни дејствија за утврдување на идентитетот на лицето или лицата кои стојат зад заканите, како и проверка на веродостојноста на информациите. Работата продолжува со целосна посветеност“, стои во соопштението на МВР.

Од Министерството апелираат до сите кои добиле слични пораки да достават формална пријава на електронската адреса: cybercrime@moi.gov.mk.

Трагедијата во Кочани остави длабоки последици врз локалната заедница, а дополнителниот притисок врз семејствата на жртвите претставува сериозно нарушување на нивната приватност и достоинство. Јавноста бара брза и ефикасна реакција од надлежните органи и казнување на сторителите според законот.