Денеска се очекува пресудата за монструозното двојно убиство на Вања Ѓорчевска и Панче Жежовски

Во Основниот кривичен суд – Скопје денеска ќе биде објавена пресудата за еден од најшокантните случаи во поновата македонска историја – двојното убиство на 14-годишната Вања Ѓорчевска и пензионерот Панче Жежовски.

За делото се обвинети Љупчо Палевски, Велибор Манев, Боре Видевски и Влатко Кешишев, додека таткото на девојчето, Александар Ѓорчевски, се гони како соучесник.

Монструозен план за грабнување и уцена

Според обвинението, обвинетите заеднички го испланирале киднапирањето на Вања со намера да изнудат откуп. Жртва на нивниот план бил и пензионерот Жежовски, кој бил грабнат и убиен само за да се искористи неговото возило – „Ситроен“ – за киднапирањето на девојчето.

Обвинетите се изјаснија за невини, а нивната одбрана побара ослободителна пресуда. Јавното обвинителство, пак, во завршните зборови побара максимална казна – доживотен затвор за Палевски, Видевски, Кешишев и Манев.

Јавноста со нетрпение ја очекува одлуката

Случајот предизвика огромна вознемиреност и гнев во јавноста, особено поради бруталноста и вклученоста на родителот во злосторството. Одлуката на судот денес ќе стави правна точка, но траумата за семејствата и општеството останува.