ЦУК: Четири активни пожари, изгаснати 18 низ земјата

Заклучно со 21:00 часот, на територијата на државата се регистрирани вкупно 22 пожари на отворен простор, од кои четири се сè уште активни, додека осумнаесет се изгаснати, информира Центарот за управување со кризи (ЦУК).

Активни пожари

• Во општина Прилеп, кај селото Бешиште, каде што гори квалитетна мешана шума. Крак од истиот пожар се проширил и во с. Градешница, општина Новаци.

• Во општините Валандово и Богданци, меѓу селата Грчиште, Паљурци и Богданци, каде гори ниска вегетација и мешана ниска шума.

• Во с. Црешнево, општина Македонски Брод, каде што е зафатена деградирана дабова шума.

• Во с. Длабочица, општина Старо Нагоричане, каде што гори борова и мешана шума.

ЦУК соопшти дека во гаснењето на терен се вклучени противпожарни единици, шумска полиција, локални власти и доброволци, а активностите се координирани со надлежните институции.

Изгаснати пожари во 18 општини

Меѓу веќе изгаснатите пожари се и оние во Шуто Оризари, Центар, Карпош, Радовиш, Гратско, Демир Капија, Гостивар, Кичево, Дебар, Кочани, Делчево, Липково, Битола и Прилеп. Повеќето од нив зафатиле ниска вегетација, ѓубришта и стрништа.

Апел за внимателност

ЦУК апелира до граѓаните да бидат исклучително внимателни при движење и престој во природа, да не палат огнови, и веднаш да пријават евентуален пожар на бесплатниот телефонски број 112.

„Остануваме во постојана координација со сите надлежни служби и ги следиме состојбите на терен со цел навремено и ефикасно делување.

информираат од институцијата.

Со оглед на високите температури и ветерот, опасноста од проширување на пожарите останува висока, а секое неодговорно однесување може да доведе до сериозни последици.