Станишиќ ќе ја издржува затворската казна во Германија: Прва правосилна пресуда за српската тајна служба

Јовица Станишиќ, поранешниот началник на Службата за државна безбедност (СДБ) на Србија, кој беше правосилно осуден на 15 години затвор од страна на Меѓународниот резидуален механизам за кривични судови (ICTR) за воени злосторства извршени на територијата на поранешна Југославија, остатокот од казната ќе го издржува во Германија. Оваа одлука е донесена од претседателката на Механизмот, судијката Грациела Гати Сантана.

Станишиќ, кој досега се наоѓаше во притвор во Хаг, ќе биде префрлен во германски затвор веднаш по прифаќање на формалното барање од страна на германската влада. Во одлуката се наведува дека ОН немаат услови за долгорочно задржување на осуденици по изрекувањето на правосилна пресуда, ниту имаат договор за извршување казни со Холандија.

Претходното барање на Станишиќ да биде прегледан од судски медицински експерт беше отфрлено од Гати Сантана, и покрај неговите тврдења за сложена здравствена состојба што би можела да го отежне трансферот.

Злосторства и пресуда

Станишиќ и Франко Симатовиќ, поранешен командант на Единицата за специјални операции (ЈСО), беа осудени на по 15 години затвор во мај 2023 година за нивната улога во организирање и поддршка на паравоени формации кои извршувале етничко чистење на територии во БиХ и Хрватска. Според обвинението, тие биле дел од заеднички злосторнички потфат предводен од тогашниот претседател на Србија, Слободан Милошевиќ.

Во пресудата се наведува дека Станишиќ и Симатовиќ биле „клучни логистички и оперативни поддржувачи“ на злосторствата, обезбедувајќи обука, оружје, логистика и политичка поддршка за српските сили во регионот.

Со оваа пресуда, која ја потврди петчлен панел на Механизмот, се поништија претходните казни од 12 години затвор и се постави историски преседан за одговорноста на високите безбедносни структури на Србија за злосторствата во 90-тите.