ДУИ го активира Бујар Османи во битката за Чаир – најавена жешка политичка есен

Демократската унија за интеграција (ДУИ) и коалицијата „Европски фронт“ одлучија на локалните избори да настапат со силна номенклатура, испраќајќи го поранешниот министер за надворешни работи Бујар Османи во директна битка за општина Чаир.

Османи ќе се обиде да ја преземе градоначалничката функција од актуелниот Висар Ганиу, долгогодишен соработник на Изет Меџити и член на коалицијата „Вреди“. Со овој потег, ДУИ го става едно од најпознатите имиња од своите редови во центарот на една од најжестоките локални битки.

Иако на прв поглед оваа одлука може да изгледа како „поништување“ на неговата употребна вредност, испраќањето на Османи на локално ниво има за цел да ја покаже доминацијата на партијата во внатрешната албанска политичка сцена, особено во урбаните општини каде влијанието на „Вреди“ е значајно.

Одлуката беше официјализирана денеска на седница на Централното претседателство на ДУИ, на која беше потврден и кандидатот за градоначалник на Тетово – поранешниот пратеник Бајрам Реџепи.

Во рамките на „Европскиот фронт“, со свои кандидати ќе настапат и Алијансата за Албанците – и двете фракции, онаа на Зијадин Села и другата на Арбен Таравари.

Фејсбук-порака на Османи: „Ова е лична одговорност“

По објавата, Бујар Османи се огласи на Фејсбук, нагласувајќи дека оваа функција не ја доживува како политичка, туку како лична обврска:

Ова не е политичка функција, ова е лична одговорност кон моите соседи, кон иднината на нашите деца. Сакам Чаир да биде дом во кој достоинството ќе биде секојдневие.

напиша Османи, додавајќи дека сака Чаир да биде место каде што ќе растат идните генерации „во нормални, достоинствени услови“.

Меџити не ја исклучува кандидатурата

Како одговор на „тешката артилерија“ од ДУИ, не е исклучена и кандидатурата на актуелниот вицепремиер и лидер на „Вреди“, Изет Меџити. Во изјава за Канал 5, тој рече дека одлуката сè уште не е донесена, но дека е можно токму тој да биде кандидат за градоначалник на Чаир:

„Очекуваме резултати од анкети од професионални агенции и тие ќе ни дадат ориентација кој каде ќе биде, но не го исклучувам и тоа како опција.

рече Меџити.

Тој исто така потсети на последните обвинувања од скопската градоначалничка Данела Арсовска дека актуелниот градоначалник Ганиу бил вклучен во сериозни нерегуларности со фалсификување документи за легализација на дивоградби – обвиненија кои дополнително го подгреваат политичкиот конфликт во општината.