ССНМ: Новинарите мора да бидат заштитени од екстремните температури и ризици на терен

Самостојниот синдикат на новинари и медиумски работници (ССНМ) упати апел до медиумските сопственици, менаџери и уредници да не ги изложуваат своите екипи на теренска работа доколку не се обезбедени соодветни услови за нивна заштита од актуелниот топлотен бран.

Во соопштението објавено денес, ССНМ побара и од политичките и општествените актери да се воздржат од организирање на настани на отворено или на локации каде температурите се исклучително високи, со цел да се намали изложеноста на новинарските екипи на опасни временски услови.

Настаните што се веќе закажани треба да се преиспитаат, да се скратат или да се преместат на соодветни локации. Доколку известувањето во живо е неопходно, медиумите треба да обезбедат соодветна опрема, транспорт и освежување за новинарите.

порачуваат од ССНМ.

Посебен акцент е ставен и на известувањето од терените зафатени со пожари. Синдикатот бара новинарите и снимателите кои покриваат вакви настани да бидат заштитени со најмалку маски и заштитни очила, а медиумските куќи да организираат сменување на теренските тимови на пократки интервали за да се намали изложеноста на ризици, особено во ситуации кога во воздухот се присутни токсични гасови.

ССНМ најави дека ќе реагира и ќе ги пријавува до надлежните институции сите случаи во кои се нарушуваат основните услови за работа на новинарите, снимателите, фоторепортерите и останатиот медиумски персонал.