Лидерите на Камбоџа и Тајланд пристигнаа во Малезија на разговори со цел обезбедување прекин на огнот
Лидерите на Камбоџа и Тајланд пристигнаа во Малезија на разговори со цел обезбедување прекин на огнот во нивниот жесток пограничен конфликт, изјави малезиски официјален претставник, во услови на меѓународни напори за запирање на борбите кои влегоа во петти ден, пренесува Ројтерс.
Амбасадорите на САД и Кина во Малезија, исто така, беа присутни на состанокот во административниот главен град на Малезија, Путраџаја, изјави официјален претставник. Тој се одржува во резиденцијата на малезискиот премиер Анвар Ибрахим, претседател на регионалниот блок АСЕАН.
Тајланд и Камбоџа се обвинуваат меѓусебно дека ги започнале борбите минатата недела, а потоа ги ескалирале судирите со тешко артилериско бомбардирање на повеќе локации по должината на нивната копнена граница долга 817км, што е најсмртоносниот конфликт во повеќе од една деценија меѓу соседите од Југоисточна Азија.
Камбоџанскиот премиер Хун Манет претходно изјави дека разговорите биле ко-организирани од Малезија и САД и дека Кина исто така ќе учествува во нив.
„Целта на овој состанок е да се постигне итно „прекин на огнот“, иницирано од претседателот Доналд Трамп и договорено од премиерите на Камбоџа и Тајланд“, рече Хун Манет во објава на X додека заминуваше на разговорите.
Трамп во неделата изјави дека верува оти и Тајланд и Камбоџа сакаат да ги решат своите разлики откако им кажа на лидерите на двете земји дека нема да склучува трговски договори со нив освен ако не ги прекинат борбите.
Тајландскиот лидер изјави дека постојат сомнежи за искреноста на Камбоџа пред преговорите во Малезија.
„Не сме сигурни во Камбоџа, нивните досегашни постапки одразуваат неискреност во решавањето на проблемот“, изјави вршителот на должноста тајландски премиер Фумтам Вечајачаи пред новинарите пред неговото заминување за Малезија.
„Камбоџа го прекрши меѓународното право, но сите сакаат да видат мир. Никој не сака да види насилство што влијае на цивилите.“
Камбоџа силно ги негираше обвинувањата на Тајланд дека пукала кон цивилни цели и наместо тоа рече дека Тајланд довело невини животи во опасност. Апелираше до меѓународната заедница да ја осуди агресијата на Тајланд против неа.
Тензиите меѓу Тајланд и Камбоџа се интензивираа по убиството кон крајот на мај на камбоџански војник за време на кратка престрелка. Граничните трупи од двете страни беа засилени во услови на целосна дипломатска криза што ја доведе кревката коалициска влада на Тајланд на работ на колапс.
Малезискиот премиер Анвар Ибрахим предложи разговори за прекин на огнот веднаш откако граничниот спор прерасна во конфликт во четврток, а Кина и САД исто така понудија да помогнат во преговорите.