Издадено предупредување за цунами по силен земјотрес во близина на источниот брег на Русија

По силен земјотрес со јачина од 8.7 степени според Рихтеровата скала, кој вечерва ја погоди областа кај источниот брег на Русија, издадени се предупредувања за можна појава на цунами, соопшти Американската геолошка служба (USGS).

Земјотресот се случил на околу 136 километри оддалеченост од Петропавловск-Камчатски, на длабочина од 19 километри.

Во моментот е активирано предупредување за цунами за Хавајските Острови, додека за делови од Алеутските Острови на Алјаска е издадено цунами-советување. Слични предупредувања се во сила и за крајбрежните подрачја на Јапонија.

„Врз основа на првичните параметри на земјотресот, можно е ширење на опасни цунами бранови“, соопшти Центарот за предупредување од цунами на Пацификот.