Итна евакуација поради пожарот кај Пирин – огнот зафатил над 30.000 декари, заканата останува

Околу 23:30 часот, гувернерот на Благоевград, Георги Динев, ја активираше системата за рано предупредување BG-alert и нареди итна евакуација на жителите во загрозениот регион. Сирените на Цивилната заштита беа активирани, а полицијата, жандармеријата и пожарникарите помогнаа во безбедно извлекување на населението. Околу 400 лица беа евакуирани во градот Сандански, при што дел беа сместени во спортската сала.

„Пожарот не влезе во селото Плоски, но евакуацијата беше неопходна поради интензивниот оган во близина и силниот ветер кој го насочуваше кон населеното место“, изјави директорот на Дирекцијата за противпожарна заштита и спасување, Александар Џартов, кој беше присутен на терен.

Иако точната површина на изгореното подрачје сè уште не е прецизирана, властите потврдуваат дека огнот постојано се шири. Денеска се очекува во гаснењето да бидат вклучени околу 160 лица, како и четири хеликоптери и два противпожарни авиони од Шведска.

„Примарната цел е да го ограничиме пожарот и да спречиме негово ширење кон други населени места“, додаде Џартов.

Состојбата на терен останува критична – двата приоди кон селото се блокирани, а кризниот штаб ја преиспитува позицијата на екипите. Доброволци можат да се приклучат, но само доколку се соодветно обучени и опремени, поради непристапниот терен и високите ризици.

Според гувернерот Динев, силниот, скоро урагански ветер бил клучниот фактор што го зголемил ризикот од ширење на огнот.

„Ноќта беше исклучително тешка – и за жителите и за службите. За среќа, нема повредени, а евакуацијата помина организирано, благодарение на координираните напори на Министерството за внатрешни работи“, изјави Динев.

Најголем шумски пожар во земјата

Пожарот во Пирин веќе се смета за најголем во земјата – досега се зафатени над 30.000 декари, вклучувајќи дел од територијата на природниот парк „Пирин“.

Во меѓувреме, продолжува гаснењето и во регионот на селата Срем и Устрем, кај Тополовград, каде што огнот уништил 60.000 декари, главно земјоделски површини и пасишта. Засега нема непосредна опасност за населението, а на терен се присутни пожарникари, воени сили, волонтери и тешка механизација.

„Ако ситуацијата се влоши, системот BG-alert повторно ќе биде активиран, со нови евакуации каде што ќе биде потребно“, предупреди Георги Динев.