Хуанг: Ако денес бев студент, ќе се фокусирав на природни науки

Извршниот директор на Nvidia, Џенсен Хуанг, изјави дека доколку денес повторно беше студент, наместо на софтверски науки, би се посветил на природните науки. Оваа изјава тој ја даде за време на неодамнешна посета на Пекинг, одговарајќи на новинарско прашање.

„Веројатно би ги избрал природните науки наместо софтверските,“ рече Хуанг, додавајќи дека дипломирал на 20-годишна возраст.

Природните науки, за разлика од биолошките, ги опфаќаат дисциплините како физика, хемија, астрономија и науките за Земјата – области што се фокусираат на проучување на неживите системи.

Хуанг дипломирал електротехника на Државниот универзитет во Орегон во 1984 година, а магистрирал на Универзитетот Стенфорд во 1992. Само една година подоцна, во 1993 година, заедно со Крис Малаховски и Куртис Прима, ја коосновал Nvidia – денес водечки производител на графички чипови и една од највредните технолошки компании во светот.

Компанијата неодамна го надмина прагот од 4 трилиони долари пазарна капитализација, со што стана највредната компанија на глобалниот пазар.

Иако Хуанг не навлезе детално зошто би се вратил кон науката, тој изрази силен интерес за концептот на „физичка вештачка интелигенција“, кој го нарече следниот голем технолошки бран.

Во изјава на форум во Вашингтон, Хуанг потсети дека модерната вештачка интелигенција се развива веќе повеќе од деценија, со клучна пресвртница во 2012 година кога моделот AlexNet направи пробив во компјутерскиот вид, што го означи почетокот на т.н. „перцептивна вештачка интелигенција“.

Следната фаза, според него, била „генеративната вештачка интелигенција“, која овозможи модели што не само што разбираат информација, туку и умеат да создаваат содржини во различни формати – текст, слики, код.

„Следниот бран бара разбирање на физиката, триењето, инерцијата, причинско-последичните врски,“ истакна тој, наведувајќи дека ова ќе овозможи развој на роботи кои можат да расудуваат во реалниот свет, препознавајќи сили, движења и објекти дури и кога не се видливи.

Според него, оваа технологија ќе биде клучна за идната индустриска автоматизација и решавање на глобалниот недостиг од работна сила.

„Очекувам дека фабриките кои ги градиме денес во САД ќе бидат целосно роботизирани во следната деценија,“ изјави Хуанг.