Apple најави нова инвестиција од 100 милијарди долари во производството во САД

Американскиот технолошки гигант Apple планира да вложи дополнителни 100 милијарди долари во производствени капацитети на домашно тло, со што вкупната вредност на најавените инвестиции во САД ќе достигне 600 милијарди долари.

Според информации од Белата куќа, претседателот Доналд Трамп се очекува официјално да ја објави оваа одлука во текот на денот, пренесе агенцијата „Ројтерс“.

Apple веќе во февруари годинава најави дека ќе инвестира 500 милијарди долари во американската економија во наредните четири години, вклучително и изградба на нов производствен погон во Хјустон. Со најновото проширување, компанијата ја зацврстува својата стратегија за враќање на дел од синџирот на производство во САД и за започнување со домашно производство на клучни технолошки компоненти.

Советникот за економија во Белата куќа, Кевин Хасет, во изјава за Fox Business Network потврди дека Apple наскоро ќе излезе со објава за голема инвестиција.

Новата инвестиција доаѓа во контекст на засилените напори на Вашингтон за унапредување на технолошката самостојност и зајакнување на домашната индустриска база, особено во стратешки сектори како што се полупроводниците, паметните уреди и телекомуникациската технологија.