Израел ослободи повеќе од деведест Палестински затвореници по договорот за прекин на огнот
Деведесет палестински затвореници беа ослободени утрово како дел од договорот за прекин на огнот. Ослободените од израелските затвори вклучуваа 69 жени и 21 тинејџер од Западниот Брег и Ерусалим, според податоците од Хамас, пренесува Гардијан.
Повеќето од затворениците биле ослободени од затворот Офер во Рамала на окупираниот Западен Брег и биле пречекани од илјадниците луѓе кои славеа за прекин на огнот.
Ова следеше по ослободувањето на три израелски жени кои беа држени како заложници од страна на Хамас во тунели под Газа, откако беа киднапирани од Хамас на 7 октомври 2023 година. Меѓу ослободените беше и заедничката британска државјанка Емили Дамари, која беше ослободена заедно со Роми Гонен и Дорон Штајнбрехер.
Со прекинот на огнот, стотици камиони со помош чекаат на ред да влезат во Газа за да достават материјали до 2,3 милиони жители, од кои 90% се раселени од конфликтот, многумина повеќе пати.
Светската здравствена организација изјави дека е подготвена да испрати неопходна помош во Газа за време на примирјето меѓу Израел и Хамас, но дека ќе биде потребен „систематски пристап“ низ целата територија за да го стори тоа. Поголем дел од здравствената инфраструктура на Појасот Газа е уништена од израелските напади за време на повеќе од едногодишната војна.
Првата фаза од примирјето стапи на сила по тричасовно одложување, за време на кое израелските воени авиони и артилерија ја гранатираа Газа. Најмалку 13 лица загинаа, според палестинските здравствени власти. Ал Џезира извести дека најмалку две ракети погодиле семејство кое патувало на запрежна кола додека се обидувале да се вратат дома.
Илјадници раселени Палестинци почнаа да се враќаат дома, многумина во уништени згради и домови во урнатини. Не постои детален план за управување со Газа по војната, а уште помалку за нејзина обнова. Девет од десет домови се уништени, како и училиштата, болниците, продавниците, џамиите и гробиштата.
Според првата фаза на договорот за примирје, која треба да трае 42 дена, Хамас се согласи да ослободи 33 заложници, меѓу кои деца, жени (вклучително и женски војници) и мажи на возраст над 50 години, во замена за стотици Палестинци кои се наоѓаат во израелски затвори.
Во втората фаза, преостанатите живи заложници треба да бидат ослободени, а соодветен број палестински затвореници ќе бидат пуштени на слобода, додека Израел целосно ќе се повлече од територијата. Деталите ќе бидат предмет на понатамошни преговори, кои треба да започнат 16 дена по почетокот на првата фаза.
Третата фаза ќе се однесува на размена на телата на починатите заложници и членови на Хамас, како и на започнување план за обнова на Газа. Договорите за идното управување со Појасот Газа остануваат нејасни.