Трамп најави можен пресврт при изјава дека царините за Кина „ќе се намалат значително“
Претседателот на САД, Доналд Трамп, најави можен пресврт во трговската војна со Кина во услови на постојана нестабилност на пазарите, изјавувајќи дека високите царини на кинески производи ќе „се намалат значително, но нема да бидат нула“, пренесува Си-Ен-Ен.
Изјавата на Трамп на прес-конференција во Белата куќа, претставува реторичко повлекување по неколку недели на остри ставови и меѓусебни одмазди кои ги кренаа царините за Кина на повеќе од 145 отсто.
„145% е многу високо и нема да остане толку високо,“ изјави Трамп во разговор со новинари во Овалната соба. „Нема ни приближно да биде толку високо. Ќе се намали значително. Но нема да биде нула“, изјави Трамп.
Овие коментари следеа по изјавата на министерот за финансии, Скот Бесент, кој претходно истиот ден изјавил дека високите тарифи меѓу САД и Кина де факто го ставиле трговијата меѓу двете економии под ембарго. Бесент, на приватна инвестициска конференција организирана од JP Morgan Chase, изјавил дека трговската војна со Кина е неодржлива и очекува деескалација во блиска иднина, потврди извор запознаен со настанот за Си-Ен-Ен.
Наместо целосен прекин или раздвојување на економиите на САД и Кина, Бесент на инвеститорите им рекол дека целта е ребалансирање на трговијата, изјави истиот извор. Оваа проценка ја поттикна берзанската еуфорија на Волстрит во вторникот, при што сите три главни американски индекси ги достигнаа своите дневни рекорди по објавувањето на изјавите на Бесент.
Азиските берзи исто така пораснаа во средата, со индексот Hang Seng на Хонг Конг кој водеше со раст од 2.5%, додека јапонскиот Nikkei 225 се зголеми за околу 2%, а корејскиот Kospi за 1.5%. Пресвртот во тонот на Трамп не помина незабележано во Кина. Во средата, хаштагот „Трамп се повлече“ беше трендинг тема на кинеската социјална мрежа Weibo, со над 110 милиони прегледи.
Двете најголеми економии во светот воведоа рекордни тарифи една на друга во брзо ескалирачки конфликт кој ги вознемири глобалните пазари, ги наруши синџирите на снабдување и предизвика стравови од рецесија.
„Многу пријатно“
И покрај сè, Трамп инсистираше дека има „многу добар однос“ со Си Џинпинг, и додека чекаше кинескиот лидер да се јави, им кажувал на своите соработници дека САД нема да го направат првиот чекор, објави претходно CNN.
Наместо да го повика Трамп за преговори, Си започна дипломатска офанзива со други трговски партнери за да одговори на американските обиди да ја изолираат Кина економски преку царинската војна.
На прашањето дали САД ќе одигруваат со „тврда рака“ со Кина или Си за да постигнат договор, или дали ќе се спомене пандемијата на Ковид-19, Трамп брзо одговори: „Не.“
„Не, не, ќе бидеме многу пријатни. И тие ќе бидат многу пријатни, и ќе видиме што ќе се случи,“ додаде претседателот. „Но на крајот, тие мора да постигнат договор, бидејќи во спротивно нема да можат да имаат трговија во САД, а ние сакаме да бидат вклучени. Мислам дека ќе живееме многу среќно заедно и идеално ќе соработуваме, така што мислам дека сето ова ќе заврши многу добро,“ посочи Трамп.