Јапонскиот министер за земјоделство поднесе оставка по скандал со ориз: „Никогаш не сум купил, ми го донираат“

Министерот за земјоделство на Јапонија, Таку Ето, поднесе оставка откако неговата изјава дека никогаш не купува ориз бидејќи го добива како донација од поддржувачи предизвика бран незадоволство во јавноста. Изјавата доаѓа во време кога земјата се соочува со значително зголемување на цените на храната, особено оризот – основен производ во јапонската кујна.

„Тукушто му ја поднесов мојата оставка на премиерот Ишиба“, изјави Ето пред новинарите, додавајќи дека не се чувствува повеќе соодветен да ја води институцијата во време на растечка криза со цените на храната.

Изјавата на Ето, дадена на настан за собирање средства, дека „никогаш не сум купил ориз затоа што моите поддржувачи ми донираат толку многу што практично би можел да го продадам“, ја налути јавноста. Реакциите беа особено остри бидејќи, според официјални податоци, цената на вреќа ориз во април била речиси двојно повисока од лани.

Скандалот го засили ионака растечкиот притисок врз премиерот Шигеру Ишиба, кој се соочува со критики поради неспособноста да се справи со кризата на трошоците за живот, особено пред изборите за горниот дом на парламентот во јули.

На почетокот од кризата, владата се обиде да интервенира ослободувајќи околу 300.000 тони ориз од стратешките резерви со цел да ги стабилизира цените. Но, коментарите на министерот ја нарушија довербата на јавноста во искреноста и чувствителноста на властите кон секојдневните предизвици на граѓаните.

Ето ќе биде заменет од Шинџиро Коизуми, поранешен министер за животна средина, кој лани неуспешно се кандидираше за лидер на Либерално-демократската партија.