Условна казна за претседателот на поранешниот Културен клуб „Иван Михајлов“ во Битола

Основниот суд во Битола изрече условна казна од една година затвор за Љупчо Георгиевски, претседател на поранешниот Културен клуб „Иван Михајлов“. Пресудата следува по пријава поднесена од Комисијата за заштита од дискриминација, во врска со содржини објавени на официјалната Facebook страница на клубот, за кои обвинителството тврдеше дека „ги навредуваат чувствата и правата на голем број граѓани“.

Георгиевски ја соопшти пресудата преку објава на социјалните мрежи, тврдејќи дека неговото единствено прегрешение било тоа што отворено се изјаснил како Бугарин.

„Не сум повредил ничие достоинство. Единственото мое прегрешение е што го почитувам делото на Иван Михајлов и што бев на чело на културен клуб кој се залагаше за зачувување на бугарската меморија во Македонија.

напиша Георгиевски.

Софија остро реагира на судската одлука

Министерството за надворешни работи на Бугарија реагираше остро, оценувајќи ја пресудата како „апсолутно недозволива“. Во нивната официјална изјава се наведува дека:

Во држава која тврди дека е пример за мултиетничка демократија, отвореното изразување на припадност кон бугарскиот народ и ширењето на автентична бугарска литература не смее да биде предмет на кривичен прогон.

Адвокатот најави жалба

Одбраната на Георгиевски најави дека ќе поднесе жалба на пресудата. Судскиот процес започна во 2023 година, а случајот се одвива во контекст на влошени билатерални односи меѓу Северна Македонија и Бугарија, особено поради прашањата поврзани со правата на граѓаните со бугарска етничка или културна идентификација.