Фон дер Лајен: Дипломатијата е најдоброто долгорочно решение во конфликтот меѓу Израел и Иран

Претседателката на Европската комисија, Урсула фон дер Лајен, во телефонски разговор со израелскиот премиер Бенјамин Нетанјаху изјавила дека дипломатијата е најсоодветниот пристап за долгорочно решавање на тензичните односи со Иран.

Иако не повика на итен прекин на огнот, фон дер Лајен нагласи дека Иран не смее да поседува нуклеарно оружје, оценувајќи го тоа како сериозна закана за регионалната и глобалната безбедност.

Ние секогаш сме биле многу јасни – Иран никогаш не смее да има нуклеарно оружје. Долгорочно, дипломатското решение е единствениот пат кон трајна стабилност, рече таа.

Фон дер Лајен повтори дека Израел има право на самоодбрана, но подвлече дека преговорите се неопходни за избегнување понатамошна ескалација и нестабилност на Блискиот Исток.

Последните настани покажаа зголемена поврзаност меѓу конфликтите во Европа и на Блискиот Исток. Истите типови на ирански беспилотни летала и балистички ракети денеска ги погодуваат и градовите во Украина и во Израел“, предупреди таа.

Изјавата доаѓа во момент на засилени тензии во регионот, по најновите ирански напади врз израелски цели, што ја зголемува загриженоста во меѓународната заедница за можноста од поширок вооружен конфликт.