Трамп од Шкотска со остри критики кон миграцијата и ветерната енергија

Американскиот претседател Доналд Трамп, при неговата посета на Шкотска, изрази силна загриженост околу миграционите политики на Европа и експанзијата на обновливите извори на енергија, особено ветерната.

По пристигнувањето на аеродромот Прествик во Глазгов, Трамп порача дека Европа е соочена со „деструктивна миграциска инвазија“ и предупреди дека доколку не се преземат мерки, „повеќе нема да постои Европа“. Покрај тоа, ги повика европските лидери да ја прекинат употребата на ветерни турбини, велејќи дека тие ја нарушуваат природната убавина, го загрозуваат живиот свет и негативно влијаат врз морскиот екосистем.

Лидерот на Лабуристичката партија и актуелен британски премиер, Кир Стармер, претходно најави дека Велика Британија ќе инвестира значајни средства во обновливи извори, вклучително и ветерната енергија, што е спротивно на ставот на Трамп.

Трамп веќе подолго време води кампања против ветерната енергија. Во Шкотска, тој неуспешно поднесе тужба за проект со турбини во близина на неговиот голф-ресорт, тврдејќи дека му го нарушуваат погледот на теренот.

Американскиот претседател престојува во Шкотска поради активности поврзани со неговите голф-ресорти. Во текот на петдневната посета, планира отворање на ново голф игралиште со 18 дупки, наречено „МекЛеод“, во чест на неговата мајка Мери Ен, родена во Шкотска.

За утрешниот ден е најавена негова средба со претседателката на Европската комисија, Урсула фон дер Лајен, додека во понеделник се очекува да разговара и со британскиот премиер Стармер, како и со шкотскиот премиер Џон Свини.

Во фокусот на средбите ќе биде трговскиот договор меѓу САД и ЕУ. Соговорниците се обидуваат да постигнат договор пред 1 август, кога треба да стапат во сила нови царини од 30 отсто. Трамп навести можност за намалување на царините доколку ЕУ го прошири пристапот за американски производи. Тој оцени дека шансите за договор се „50 наспрема 50“, но изрази оптимизам и ја пофали Фон дер Лајен како „многу почитувана жена“.

Минатиот месец САД и Велика Британија постигнаа прелиминарен трговски договор, но многу аспекти остануваат нерешени.