САД предупредуваат дека политичката блокада може да ги загрози односите со Косово

Во интервју за Газета Експрес, претставничката на администрацијата на американскиот претседател Доналд Трамп, Пратипати, изјави дека продолжувањето на политичката блокада во Косово може да ги загрози економските можности и стратешкото партнерство меѓу двете земји.

Администрацијата на Трамп бара силни сојузници. Косово мора да создаде услови за унапредување на односите, а шансите за економски развој може да се изгубат ако оваа блокада продолжи.

изјави Пратипати.

Таа потенцираше дека одговорноста за решавање на политичката криза ја носат косовските лидери, додавајќи дека „САД можат да понудат поддршка, но не можат да одлучуваат наместо лидерите или народот на Косово“.

На прашањето зошто меѓународната заедница не посредува како во минатото, Пратипати одговори дека Косово веќе не е во фаза на градење држава и дека локалните лидери треба да покажат зрелост и да најдат компромис.

Упозорување за исклучување на српските партии

Пратипати предупреди и на обидите за исклучување на српските политички партии од косовскиот политички процес. Според неа, тие ги претставуваат граѓаните на Косово и не треба да им се ускратува правото на учество.

Користење административни или процедурални трикови за спречување на учество на партии или поединци би ги компромитирало резултатите од изборите.

нагласи таа.

Критика за одлуките на Владата во оставка

Во врска со односите меѓу САД и Косово, Пратипати посочи дека потезите кои ги зголемуваат тензиите, како што е затворањето на српските паралелни институции без претходна координација, го отежнуваат партнерството.

Не го оспоруваме интегрирањето на овие институции во косовскиот систем, но начинот на кој тоа се спроведува е од суштинско значење.

додаде таа.

Според Пратипати, владата на премиерот во оставка Аљбин Курти има обврска да обезбеди безбедност и просперитет за сите граѓани, а не да презема еднострани чекори кои ја загрозуваат стабилноста во регионот.